Nuwun,
Wonten ngarsanipun Bapak Budi
Sularso minangka duta saraya saking panjenenganipun Bapak-Ibu Slamet Utomo
ingkang satuhu kinurmatan. Mekaten ugi sedaya kadang pangombyong ingkang
sinungga ing akarami, sarta para rawuh ingkang sinuba ing kawilujengan.
Kula minangka
wakilipun Bapak-Ibu Sugeng Raharjo tansah amuji sih palimarmaning Gusti ingkang
sampun ngrumentahaken kabagyan, kamulyan sarta kawilujengan dhumateng baraya
agung Bapak-Ibu sapengombyong sarta para tamu ingkang minulya.
Bapak Budi Sularso salam taklim panjenengan sampun kula tampi kanthi
tinarbukaning manah. Pakurmatan dhumateng Bapak-Ibu Sugeng Raharjo handadosaken
toya kekiyatan mrih sentosa anggenipun badhe hamiwaha putra, ngentas pitulus
ingkang putri kinasih. Sungkem paduka dhumateng para pinisepuh ndadosaken
hayoming kalbu mugi hanambah kekiyatan hanggenira hamengku putra tumekeng putu.
Mekaten ugi kula ngaturaken salam taklim katur wonten ngarsa panjenengan, salam
pakurmatan dhumateng ingkang handuta panjenengan, sarta sungkem pangabekti
konjuk para pepundhen miwah kasepuhan.
Sarawuh panjenengan
sedya kula ngaturaken pambagya kawilujengan sinartan pepuji mung tansah
sumandhing ing katentreman sarta karahajan, tinebihaken ing sarusiku, kalis ing
sapu dhendha satemah yuwana nir ing sambekala.
Kajawi menika kados kadhawahan daru wahyuning kamulyan, manggih cepaka mulya
ing satengahing marga dupi kula mireng ingkang dados dhawuh pangandikanipun
Bapak Sugeng Raharjo . Rawuh penjenengan saestu ndadosaken suka renaning manah
kula. Sedaya kalawau kinarya pratandha supeketing paseherekan. Kathik rawuh
panjenengan taksih kasdu ngasta ubarampe uakarta majemukan srah-srahan. Sedaya
kalawau handadosaken mongkoking namah kula sarta nedahaken kalamun panjenengan
trahing Jawi ingkang satuhu pana ing kalungguhaning buaya adat tatacara Jawi.
paringan panjenengan kula tampi kanthi lumahing asta sarta bingahing manah.
Kula boten saged atur piwales menapa-menapa kajawi hamung munjuk mring
ngarsaning Gusti, mugi Gusti kang Mahamirah paring lelintu ingkang sakalangkung
murakabi tumrap kulawarga panjenengan.
Mekaten ugi, tumrap pasrahing calon penganten kakung Nakmas Bagus Bayu Tirta
Aji saestu kula tampi sarta ndadosaken remening manah, calon penganten badhe
nyantri ing papan menika. mugi hinawuyan Gusti kang Mahahayu satemah rahayu
kang samya tinemu sinengkuyung para pepundhen kang tansah hamuji rahayuning
kang samya dumadi.
Kalamun sampun dumugi ing wahyaning mangsa kala Anakmas Bagus Bayu Tirta Aji
badhe kula dhaupaken kaliyan anak kula pun Nini Rara Sekar. Panyuwun kula mugi
karsa paduka suka pepuji mrih sageda lulus raharja ing samudayanipun ngantos
paripurnaning gati.
Mugi sekeca anggenipun lenggahan sinambi
bawarasa bawakarsa kaliyan para kadang tamu ngantos paripurnaning adicara.
Kalamun para kadang kaneman pramubujana sampun kepareng ngaturaen pasugatan
unjukan, nyamikan saha dhaharan kersa ngrahabi kanthi mardikaning penggalih.
Bokmenawi anggenipun ngacarani rawuh paduka kirang gupuh ing aruh, mungguh ing
lingguh dhahar ingkang kirang lawuh, mugi panjenengan sedaya kersa
nglumunturaken sih gunging samudra pangaksama.
Nuwun.
Komentar
Posting Komentar