Nuwun,
Para pinisepuh miwah sesepuh ingkang kinabekten, sarta para tamu
ingkang sutresna. Awit saking mundhi dhawuhipun Bapak-Ibu ... keparenga kula
matur wonten ngarsa panjenengan.
Rumentahing puja hastawa saking Ngarsa Dalem Alloh SWT Ingkang Maha
Asih, mugi tansah kajiwa kasarira déning panjenenganipun para rawuh kakung
sumawana putri ingkang dhahat kinurmatan.
Ing madyaning pepanggihan menika sawetawis panjenengan lenggah,
kula ngaturaken pambagya kawilujengan sugeng rawuh. Panjenengan sampun kasdu
rawuh saprelu paring pangèstu hangestreni tumapaking adicara menika. Awit
saking menika, kula ngaturaken agunging panuwun, sukaning manah kula tanpa
pepindhan.
Kula tansah memuji bilih krentenging tekad bebesanan saged
kalajengaken ngantos ing titi wanci dhaup palakrama. Lan ugi kula sakulawarga
tansah nyuwun puji pandonga paduka para tamu pamrih sesambetanipun anak kula,
Nini Rara Sekar kaliyan Nakmas Bagus Bayu Tirta Aji saged tetep lestari dumugi
ing mangsa palakrama.
Panyuwun kula mugi para tamu sekéca lelenggahan ngantos
paripurnaning adicara. Nyuwun pangapunten menawi wonten kekiranganipun aruh,
lungguh, suguh. Saha bokmenawi wonten atur miwah solah bawa kula ingkang kirang
mranani penggalih, kula nyuwun agunging samudra pangaksami.
Nuwun,
Komentar
Posting Komentar