Tuladha Tanggap Wacana Mengeti Dinten Pendhidhikan Nasional (Pidato Bahasa Jawa Hari Pendidikan Nasional)

Assalamu alaikum wr.wb.

Nuwun, ingkang dhahat kinurmatan, para Bapak Ibu juri pidato Basa Jawi, para Dwija, para kadang saperjuangan ingkang kula tresnani, saha para rawuh ingkang sinurdarsana.

Kaping sepisan, sumangga kita sami hangaturaken piji syukur, Alhamdulillah dhateng ngarsanipun Gusti Ingkang Murbeng Dumadi, ingkang sampun paring karaharjan, saengga kita sedaya saged makempal sesarengan ing enjing/siyang menika ing adicara “LOMBA PIDATO BASA JAWI” kangge SMP utawi MTS sakitha Semarang taun 2012 kanthi rahayu, basuki nirbaya, nir ing sambekala.

Para rawuh ingkang satuhu kinurmatan. Kula minangka peserta lomba pidato Basa Jawi, namung saged hangaturaken pitutur ingkang tanpa reginipun, inggih menika babagan Dinten Pendhidhikan nasional.

Kenging menapa kita sedaya kedah grengseng adherekaken dinten pendidikan Nasional ? amarga kita sedaya minangka jalma ingkang kathah kekiranganipun, boten wonten ingkang sampurna ing donya menika. Ngelmu menika kedah dipunlampahi kanthi sabar, lan usaha. Dipungambaraken:

Ngelmu iku kalakone kanthi laku

Lekase lawan kas

Tegese kas nyantosani

Setya budya pangekese, durangkara….

Saking tembang kasebat saged dipunpendhet bilih kepengin pinter menika kedah rekasa, kanthi laku, pengorbanan, perjuangan, kanthi tujuan menawi ngelmu menika saged nyingkiraken bebendu ingkang awon.

            Para rawuh bapak Ibu, dalah kanca ingkang kula tresnani. Menawi nyemak dinten pendhidhikan nasional boten saged uwal saking tokoh ingkang asma Ki Hajar Dewantara. Tokoh kasebat ingkang satuhu dados piyantun ingkang ngrembakakaen donyaning pendhidhikan nasional. Pendhidhikan nasional ingkang sansaya majeng, andadosaken jagating pendhidhikan Indonesia boten katilar kaliyan donyaning pendhidhikan manca nagari. Pramila lomba tuwin kegiyatan ingkang sipatipun internasional, para lare utawi dhuta Indonesia ugi ndherek. Asilipun boten nguciwani, kadosta dados juwara karya ilmiah remaja internasional, lan sapanunggalanipun.

Gegayutan kaliyan pengetan dinten Pendhidhikan Nasional, pramila para siswa kedah sansaya sregep sinau, sansaya sregep anggenipun ngresiki kelas tuwin kegiatan sanesipun.

Kosok wangsulipun, menawi klas saha lingkungan sekolah reged, boten tumata, menapa malih gandanipun boten sekeca, murid anggenipun sinau kirang sreg. Wusana ingkang kados makaten njalari prestasinipun para lare kendho, saengga prestasi belajar siswa ugi kirang majeng.

Para rawuh ingkang kinurmatan. Saking andharan kala wau saged dipunpendhet dudutan. Ingkang kapisan, minangka manungsa kedah sinau, boten mandeng yuswanipun. Gusti ingkang Maha asih menika badhe ngginggilaken manungsa ingkang gadhah ngelmu ingkang murakabi, menawi dipunlampahaken wonten ing margi ingkang leres. Ingkang kaping kalih, Negara Indonesia menika boten kalah kaliyan Negara ingkang sampun majeng. Negara kita saged dados Negara ingkang dipunsegani bangsa sanesipun menawi leres patrapipun, boten wonten korupsi, Gemah ripah loh jinawi. Kanthi makaten, boten wonten kacingkrangan ing bebrayan.  Ingkang kaping tiga, menawi kunci sukses menika boten saged uwal saking karesikan lan kenyamananing ruwang anggenipun sinau. Lan karesikan menika saperangan saking iman.

            “Kita sedaya gadhah iman ta nggih bapak ibu….. ?!”

            Wasana cekap semanten atur kula. Menawi wonten kiranging trapsila, kula nyuwun agunging samudra pangaksami. Nuwun nuwun nuwun. Maturnuwun.

Wassalamu alaikum wr.wb.